Po?etna stranica Saznajte više o nama Naši ?lanovi Galerija fotografija Sponzori
Štorija od „zvončarije“

"Od antonji pa na daje
Lepo je va našen kraje
Da je baren vavek tako
Živet bi nan bilo lahko"

Zvončarska montura

Na glave nosi klobuk z rožicami i četire žukvi z belemi mačići va cvate. Klobuk je opleten z šparugun.
Opravan je va majice na rigi i bele brageše. Na sebe nosi ovčju kožu i tri zvonca. V ruke nosi baltu, na nogah črne škornji al visoki postoli.
Okol vrata ima ogrnjen zvončarski facol, a spreda obešen mići facolić za otrt pot.

Obahajanje

Po staroj navade i ako je dosti nedej pusta, store se 2 kruga, na ki redu skupa veli i mići zvončari.
15 dan prej pusne nedeji se gre na Veli Brgud. Gane se od Doma Permani okol 9 jutro, pak okol Božića, Ružić i Pojan do Stare pošti na marendu.
Potla marendi put peja na Mali Brgud i Veli Brgud, kade se stori 5 kol i obedva. Potla se po šume gre do Zaluki, na Brešca, Pužon, na Mučićevu ravan i nazad od kuda smo počeli, Permanon, kamo pridemo okol 7 večer. Po pute se stori 16 kol.

Četrtak prej nego se gre na Brgud se stori „Prova okol Ružić“, za novi i stari zvončari.
Na pusnu nedeju parti se od Mučićeve ravni, već okol 8 jutro, do Jurdani, preko štriki Jurdanićen i Dalotu, okol Javora na Štranjgu i v Rukavac, pak zdolun Mihotićen do Hangara, kade je marenda okol polna.
Malo se počine, pak se re do Matuj, i onda zgorun do Frlanije i Dolčića Rubešon, pak preko Kala do Špinčić na obed. Potla obeda poć je proti doma; preko Vlahovega Brega, Jušićen, Jurdanon,
Mučićen i d o Doma Pe rmani, kade je likuf . Stori se 18 kol.
Na pusnu nedeju zad zvončari gre i more maškar.

Mići zvončari gredu još i na smotru mićeh zvončari pul Marčeji i na smotru mićeh zvončari va našoj općine, a domaćin je ona grupa ka dobije kjuč za to leto.

Pred zvončari gre fantina z okrunjenen majon. On je prvi va grupe i tamo kade te zvončari stroit kolo mora razgrnut judi, „pomest“ i stroit njin mesta. Za njin gre muzika, nejveć puti je to armunika, bub anj, trumbeta i bariton. Onda gredu zvončari, pak na kraje maškare.
Kada redu veli i mići zvončari skupa, mići gredu na početke grupi.
Z zvončari gre okole kapo i par judi z barilcami, ki skrbe da zvončari ne ostanu žejni i da se imaju s čen okrepit.
Va grupe gre okol 30 zvončari. Po dva redu va rede, a va prven i zadnjen po tri. Najboji zvončari su vavek na početke i na kraje grupi.

Pust va našen kraje dura od Antonji (17.januara) do pepelnice i samo va to vreme se zvoni.

Naša grupa ne hodi po paradah. Držimo se svojeh puti i obahajanja po svojen kraje kade judi poznaju „štoriju od zvončarije“ i kade postoji jedan poseban kontakt, veza, mej zvončari i publikun – judi z sela kroz ka pasujemo, kade storimo kolo, pofermamo, poćakulamo, jedanput pijemo, pojimo ulenjak, kroštulu, al ča boje ako je i gremo daje. Na povorke je zvončar turistička atrakcija, ograjena z železnun ogradun od publiki i od tega smo odustali.

Po pute se prova sakakovega vremena, ma jedanput kad se gane se ne moluje.
Osandeseteh let na jenu pusnu nedeju su šli 54 zvončari, po tri va saken rede, a zad njimi 150 maškar.

Povjest zvončarije

A od kad se zvoni nezna nijedan. Si živući znaju da su i oni pred njimi nosili zvonci. Po nekoj štorije morda je se počelo 1870. pul Andrini, ča se je kašneje zvala oštarije Zora i bila j' preko današnje Mučićeve ravni. Tamo je bila jena mej prvemi Zadrugami, kade su se svojni nahajali, morda i malo popili i potle tega zvonili po komune.

Organizirano se gre na Veli Brgud od 1984. A „Zdolun“ se gre na pusnu nedeju od potle 2. svetskega rata.
Stareji pamete da se je šlo do Rubeš i prej prvega sv.rata i da su stavjali lešnjaki nekamo pod zvonci i na kraje gjedali ki je ih jače strl.
A jena štorija poveda i da su Talijani zabranili pokrivat obraz i da se od onda nose klobuki od rožic, pak bi po ten reć da se je zvonilo i pod Talijun ma i prej nje.

Prema stareh zapiseh o običaji na područje Kastavšćini, nekada su verovalo da zvončari svojun zvonjavun tiraju zle sili zimi, čuvaju blago od štroligi i zazivali plodnost.
Zvončari predstavljaju zbujevanje prirodi, kraj zimi, pobjedu Sunca i prihajanje mladega leta.
Rožice , maj i kratki rukavi simboli su proljeća i kraj zimi, predstavljaju vegetaciju i plodnost.

Danaska bit zvončar predstavlja jubav prema mestu va ken živemo, simbolizira muškost, a familija ka ima zvončara je štimana
Zvončarska kumpanija čuva stari običaji da se ne zataru.

2009. leta Mučićevi zvončari zapisani su na UNESCO-vu listu nematerijalne kulturne baštine sveta

GORE BALTI

Povratak na vrh stranice

Udruga Mučićevi zvončari i maškare / Mučići , Jurdani 64, 51213 Jurdani / Reg.br. 08000098 / Žiro račun 2402006-1100278301

Design by (mp) © Mučićevi zvončari i maškare